البريد الالكترونى

Delivered by FeedBurner

تابعنا على فيس بوك

مذكرات سلفي في مارينا

المحتوي الرئيسي


مذكرات سلفي في مارينا
  • أحمد ساهر
    19/07/2014 05:15

من حوالي سنة حصل شيء عجيب جداً قليلين اللي أخدوا بالهم منه .. شاب سلفي من وسط أرستقراطي جداً بدأ يكتب مذكراته قبل الالتزام !! كل اللي أقدر أقوله تعليقاً على مذكراته : مساء الخير .. مساء الخير على الفجوة اللي بينا نحن أبناء التيار الإسلامي وبين هذه الشريحة التي : • درست في ال language Schools وال IG  • الشريحة اللي بتصيف في مارينا في الفلل بتاعتها (مش الشريحة اللي بتروح مع أصحابها اللي عندهم فلل) • الشريحة اللي ركبت ال Mini Cooper وال Wrangler Cabriolet و ال x5 (بتاعتها مش بتاعت مامتها أو باباها) • واما خلصوا ثانوي دخلوا ال AUC (مش أخدوا كورس انجليزي فيها) • وشاركوا في ال Autocross بعربياتهم (مش بس اتفرجوا زي الشرائح فوق المتوسطة) • الشريحة اللي حفظت وقتها أغاني Ricky Martin وBack Street boys (مش بس سمعتها) • الشريحة اللي رقصت على أغاني Avril lavagni وعيطت وحست بالضياع والغربة لما سمعت Evanescence  • الشريحة الي بتفهم ال Accent بتاعت 50Cent من غير ما تفتح ال lyric بتاعت أغانيه عشان يفهموا بيقول إيه .  • وبيتقابلوا بصفة دورية وطبيعية في Chiles و Grand (مش الشريحة اللي بتروح لما يبىقى معاهم فلوس أو بيروحوا لما اصحابهم من الشريحة دي تعزمهم على عيد ميلاد حد فيهم) • الشريحة اللي خالو مجدي لما بييجي أجازة من ألمانيا بيجيبلها هداية ipad أوكاميرا Canon 650 لداليا عشان نجحت في Grade 10 وطلعت الرابعة على ال (American Devision) في مدرستها اللي في التجمع واللي مصروفاتها 40 الف في السنة تقريباً. • الشريحة اللي لما كبرت شوية اشترت 180C ولما ربنا هداها شوية سمعت معتز وعمرو خالد ومصطفى حسني وصلت التراويح في رمضان وبعدين رجعت تاني بعد بريق التزام الجو ده ما راح .. الأخ ده كوووولنا عارفينه بس مش عارفين إننا عارفينه .. الأخ ده هو أدمن أكبر صفحة في العالم العربي (اجعل صفحة النبي رقم 1) أخ ابن ناس أوي إسمه عمرو وأبوه مش من هلاسين الطبقة دي تقدر تستشف ده من إن عمرو اتخرج من طب أسنان وأخوه واخته دكاترة (من جيلنا برضو) .. ووالده كمان طبيب .. وعكس ما كتير مننا فاكرين فالشريحة دي فيها عقلاء كتير ومش صحيح إن كلها رجال أعمال حرامية أو وزراء وأصحاب مناصب فاسدين .. تؤتؤتؤ أبسلوتلي .. في منهم بيربوا ولادهم تربية مستقيمة لحد جيد ممكن تقرا المقطع ده مثلاً لما عمرو اتكلم فيه عن طفولته اللي كان بيقرا فيها Children's concise encyclopedia: ((ولما فى تالتة أبتدائى طلعت، كالعادة، الأول على المدرسة بابا جابلى هدية نجاحى PC تانى متطور أكتر بكتير ، ساعتها كانت Microsoft ربنا فتح عليها وعملت الwindows 3.11. أنا فاكر اليوم دا بابا ندهنى وقالى أقعد، وكلمنى كأنه vito corleone وأنا michael فى فيلم godfather وقال لى إن الكومبيوتير هو المستقبل وهو اللى هيخلينى متميز وإنه عايزنى أتعلمه كويس جداً النصيحة دى عمرى ما نسيتها، بقيت من يومها بتابع كل جديد فى عالم التكنولوجي .. ولما windows 95 نزل كان نقلة خرافية بالنسبة لwindows 3.11، ساعتها بابا اتفق معايا أنا واخواتى إن كل ما واحد فينا يكتشف حاجة جديدة فى الويندوز 95 هيديله مكافئة. طبعاً أنا بحب فكرة المنافسة جداً حتى لو هاخد المكافأة أرميها فبدأت فوراً أستكشف الويندوز الجديد ، اكتشفت فيه حاجات كتير جداً بس كنت كل فترة بخرب الSystem وبابا كان بياخد الجهاز يصلحه ويجيبهولى تانى أطلع فيه رغباتى الاستكشافية)) المقطع ده يديك انطباع عن بيت عمرو من جوة قبل ما ينقلك في مذكراته لمرحلة التحول الأولى في حياته .. عمرو شاف الزاوية التانية في الوسط ده .. شاف الانحراف في المدرسة وفي مارينا ومع قريبه المنفتح جداً .. عمرو كان طول الوقت جوة الشريحة دي أوي .. صيف في مارينا .. ووقف بعربيته في أون ذا رن .. ولعب مع أصحابه وصحباته Estimation وBowling كل ده من غير ما يعك بسبب التربية المحافظة اللي حكينا عليها وده شئ حيحسسك بحجم الصراع النفسي و الشخصية ال Schizophrenic اللي جواه واللي اتكونت (وقتها) بسبب الوسط ابن المجنونة ده .. لغاية ما ربنا شرح صدره للهداية. عمرو في مذكراته الشيقة جداً كان بيربط القارئ بالالتزام بطريقة عجيبة جداً .. كان بيسرد تأملات إيمانية أثناء حكايته لهذه الأيام وما فيها من مواقف .. وبمعنى أوضح : ذكريات عمرو أكيد متشابهة مع ذكريات أبناء هذه الشريحة فكان بيوقفهم في المذكرات على زوايا هذه الذكريات (اللي هي ذكرياتهم كمان) ويشاورلهم على الصح في كل موقف: على البلاج .. في الكافيه .. في بولة الEstimation في line المدرسة في أول قصة حب طفولية بريئة ومضحكة .. وأول قصة حب مراهقة وهبلة .. وأول قصة حب حقيقية فاشلة.. في ال GYM .. وحتى لما عربية عالطريق تهدي جنبك عشان صاحبها عايزك تسابقه !! في كل موقف من دول كان عنده خاطرة إيمانية عميقة .. الحلقة الجاية حاسلط الضوء على بعض المواقف العجيبة جداً والتأملية جداً في مذكرات (الأخ) عمرو وحنشوف التدرج النفسي والتطور الروحي اللي حصل لشاب سلفي نشأ في (عالم مارينا) .. ولكن .. أخي الكريم أختي الكريمة: لو حتقروا المذكرات دي وانتوا فاكرين إنها موجهة لينا حتزعلوا منه وممكن تقولوا عليه لسه بقايا الجاهلية في قلبه وبينشر الشر القديم اللي اتشربه .. لكن أنا فاهم دماغه كويس وأنصحك تفهم الجزئية اللي جاية دي كويس:  عمرو كتب مذكراته مش لينا .. بل كتبها لأبناء الوسط ده اللي لما يقولهم البنت (كانت لابسة Skirt) حيتابعوا القراية لإنهم حيحسوا إنهم بيقروا لواحد منهم فاهمهم بيتكلم كلامهم لكن لما يكتب كانت (لابسة جيبة قصيرة) ممكن ما يعيشوش المكتوب أوي رغم إن ال Skirt هي الجيبة القصيرة  ومن أكبر الأدلة على الكلام ده إن بعض شباب مارينا طبعوا واحدة من مذكراته ووزعوها مجانا على نفس الوسط في مارينا (زي ما قال في واحدة من مذكراته) .. . يتبع بإذن الله

أخبار ذات صلة

"أبي في ذمة الله، إنا لله وإنا إليه راجعون" هكذا أعلنت علياء نبأ وفاة والدها، المرشد العام السابق لجماعة الإخوان المسلمين، محمد مهدي عاكف، بعد ... المزيد

تعليقات