البريد الالكترونى

Delivered by FeedBurner

تابعنا على فيس بوك

في السجن تعرف معنى: وحيل بينهم وبين ما يشتهون

المحتوي الرئيسي


في السجن تعرف معنى: وحيل بينهم وبين ما يشتهون
  • خالد الشافعي
    27/10/2015 03:00

في السجن عرفت معنى قول ربنا: وإن تعدوا نعمة الله لا تحصوها
 
حواليك وفي ايديك وتحت رجليك ملايين النعم
بدون مبالغة : ملايين النعم
مش هاعدلك النعم الكبيرة 
إنما تخيل نعمة إنك تشوف وشك في مراية أو إنك تنام على سرير أو إنك تنام في الوقت اللي انت تحدده أو إنك تنام في مساحة تسمح لك إنك تتقلب وانت نايم أو إنك تقوم من النوم في الوقت اللي تحبه
الناس بتنام فوق بعضها وفيه ناس بتفضل واقفة لحد ماييجي دورها عشان تنام
دورة المياه بالطابور 
 
تخيل إنك تلبي الآذان نعمة كبيرة قوي ونعمة إنك تصلي الجمعة 
نعمة إنك تاكل أكل سخن وتاكل أكل بتحبه 
نعمة إنك تاكل بمعلقة معدن وتشرب الشاي في كوباية قزاز ، زهقت من المعلقة البلاستيك والكوباية الورق والطبق الورق
نعمة إنك تكون في بيتك مع عيالك وتاخدهم في حضنك 
تخيل لما يكون مسموح لك تشوف عيالك دقايق كل أسبوع وبينك وبينهم سلك والأعداد مهولة وانت مش سامعهم ولا هم سامعينك وابنك الصغير حاطط وشه ع السلك وبيبص لك بنظرات تذبحك 
 
نعمة الموبايل اللي في ايدك تكلم من تشاء وقت ما تشاء 
نعمة انك تقرا كتاب أو تخرج وتدخل وقت ما تحب 
نعمة إنك تدخل دورة المياه وقت ماتعوز وتغتسل وقت ما تعوز 
 
حواليك نعم كتيييييير قوي
ملايين النعم
واقل نعمة فيهم في السجن قيمتها بتكبر
الرعب لما بتمرض
المرض في السجن مرعب
ممكن اقل مرض يقتلك
لما بتطلعلك حباية بتترعب
لما بيجيلك برد بتخاف
لما بتسمع صوت الآذان في الشارع بترتجف 
وخصوصا يوم الجمعة 
يوم الجمعة بتصلي الظهر في زنزانة اتنين في تلاتة
وصوت الخطبة جي من الشارع يجننك
وريحة البيت في الهدوم اللي جيالك في الزيارة بتقتلك
 
إنت بالنسبة لأهلك شخص ميت بيعود للحياة الربع الساعة بتاعة الزيارة الأسبوعية
والرعب كل الرعب لو جه معاد الزيارة وحد من عيالك ما جاش ، انتم مخبيين عليا إيه ؟ الولد ما جاش ليه ؟ 
لما بتشم ريحة طبيخ أو تشوف نوع فاكهة بتحبه أو كوباية شاي مظبوطة ؟
تخيل الزنزانة بدون دورة مياه
24 ساعة ماسك نفسك و لو ماقدرتش مافيش قدامك إلا إنك تتبرز في كيس قدام الناس اللي معاك في الزنزانة
 
السجن فتنة عظيمة
وميدان القول غير ميدان العمل
وخصوصا اما تكون أول مرة في حياتك تتسجن
وللأمانة فيه ناس كتير جوه السجن ما أثرش فيهم السجن زي ما أثر فيا 
بالنسبة لي أنا السجن كان جحيم حقيقي
اكتشفت إني شخص ضعيف ورصيدي الإيماني قليل قوي
طول فترة السجن وانا فاكر كلمة أديب روسي : في السجن يعاني المرء من عجز في المكان وفائض في الزمان
وكونك محبوس في قضية مفتوحة يعني مافيش قاعدة تتوقع بيها المدة اللي هتقعدها 
مافيش مدة معينة عشان تعد عد تنازلي وتربط نفسك بيها ، دي لوحدها موت بطيء
وصدق اللي قال : السجن كالموت يأتي فجأة 
الموت بيخطف والسجن بيخطف
وفي السجن تعرف معنى: وحيل بينهم وبين ما يشتهون 

أخبار ذات صلة

مقدمة ونقاط

لطالما احترم المنصف النقد العلمي المبني على وقائع وحقائق لا على جهل وشقاشق ... المزيد

أستاذي الدكتور صلاح الدين سلطان، أحد الدعاة البارزين في هذا العصر، وأحد العلماء العاملين، وصاحب التجربة الثرية والواسعة في الدعوة إلى الله تعالى، ذ ... المزيد

أعلنت جهتان مسؤوليتهما عن الهجوم المسلح على العرض العسكري في مدينة الأحواز جنوب المزيد

تعليقات